التحرش الجنسي بالأطفال

بتكلم عن شي وايد مهم بس مو متعارف عليه بمجتمعنا! و قليل جداً أهالي تتكلم عن هالموضوع مع عيالهم أو بشكل عام!

التحرش الجنسي بالأطفال

شنو معنى التحرش الجنسي بالأطفال؟ 

التحرش الجنسي بالأطفال من أخطر الجرائم الي في المجتمع . وهو اتصال جنسي بين طفل وشخص بالغ لإرضاء رغبات جنسية، و له عدة أشكال. 

أدري إن محد يتخيل هالشي الفظيع يصير معاه بس خل نكون واقعيين! الـمـشـكـلـه موجوده و بشكل كبير و عادةً الطفل يتعرض لها بغفلة الأهل و بالأغلب يصير من داخل البيت أو من الأقارب! أدري بتقولون مستحيل!! ماكو شي مستحيل و هذا الواقع! و هذا السبب الي خلاني أكتب عن هالشي و أوّعي الأهالي بالموضوع. 

لما آدم و جنى كانوا بالروضة كلمتهم عن هالموضوع، الموضوع وايد حساس بس كان الحوار لازم يصير، بلشت معاهم بكل هدوء و بطريقة جداً سلسه بيّنت لهم شنو اللمس المسموح و اللمس الغير مسموح شنو أوكي و شنو لا، وضحت لهم إن الحين كبروا و أعضاءهم الخاصة وايد سبشل و محد له الحق يشوفهم، و آخر شي و بالنسبة لي أهم شي أن أنا دايماً موجودة و لازم يقولون لي كل شي حتى لو شي مو زين لأن أحبهم أكثر من أي شي بالدنيا و دايماً راح أكون يمهم و معاهم. 

بالنسبة لي تتكلمون مع اعيالكم من أهم الأشياء الي اتسونها! أحياناً التحرش الجنسي يستمر و يصير أكثر من مرة لعدم وعي الطفل بالشي و ما يدري إنه غلط أو يمكن يحس الطفل إنه مو مرتاح من الي قاعد يصير بس خايف يتكلم لمليون سبب براسه! 

و الله لا يقول يصير شي مع أحد على طول تصرفوا أدري ان الموضوع كبير و صدمة بس لازم الأم أو الأبو يكونون أقويا و يكونون مسيطرين على أعصابهم و مشاعرهم جدام الطفل لأن التحرش الجنسي بأنواعه مو بس حادثة و تعدي! ينتج عنه اضطراب نفسي على مدى طويل و قصير، و تكوّن أمراض نفسية، عاطفية و اجتماعية. 

Advertisements